20. oktober 2000 UKA 2000/23
Takornariartitsinermik inuussutissarsiuteqarnermut aningaasalersuinikkut tapersiisarneq pillugu
Inatsisartut inatsisaata allanngortinneqarneranik Inatsisartut inatsisissaattut siunnersuutpillugu
inatsisissatut siunnersuutip aappassaaneerneqarnissaanut
Inatsisartut Takornariaqarnermut Ataatsimiititaliaata
ISUMALIUTISSIISSUTAA
Inatsisartut Takornariaqarnermut Ataatsimiititaliaat suliarinninnermi ukuninnga inuttaqarpoq
Inatsisartuni ilaasortaq Ruth Heilmann (Siumut), siulittaasoq
Inatsisartuni ilaasortaq Malînánguaq Marcussen Mølgaard (Inuit Ataqatigiit), siulittaasup tullia
Inatsisartuni ilaasortaq Per Rosing-Petersen (Siumut)
Inatsisartuni ilaasortaq Finn Karlsen (Atassut)
Inatsisartuni ilaasortaq Loritha Henriksen (Kattusseqatigiit)
Takornariaqarnermut Ataatsimiititaliap inatsisissatut siunnersuummik suliaqarnera:Inatsisartut Takornariaqarnermut Ataatsimiititaliaat siunnersuummik matuminnga ataatsimiititaliap suliarinninneranut atatillugu tusarniaanermi akissutitut pissarsiat nuutinneqarnerinik pissarsivoq.
Takornariaqarnermut Ataatsimiititaliap oqaatigissavaa inatsisissatut siunnersuusiassamut missingiusiamut Inuussutissarsiornermut Pisortaqarfik tusarniaassumik ulloq 10. juli 2000-imi, ulloq 21. juli 2000-imi akissuteqartoqartussanngorlugu, nassiussisimasoq.
Takornariaqarnermut Ataatsimiititaliap oqaatigissavaa tusarniaanermut akissuteqarnissamut piffissaliussaq ullunik aqqaniliinnarnik periarfissaqartitsiviusoq akuerineqarsinnaanngitsumik sivikippallaartoq, minnerunngitsumik piffissaliineq inuit piffissami sulinngiffeqarnerisa nalaani inissinneqarsimammat. Tassunga atatillugu ataatsimiititaliap eqqaasitsissutigissavaa Inatsisartut Inatsisit Atortinneqarnerannut Ataatsimiititaliaata siusinnerusukkut isummamisut saqqummiunnikuummagu, inatsisissatut iunnersuutit tusarniaassutigineqassatillugit aallaavittut isigalugu sapaatip akunnerinit sisamanit sivikinnerunngitsumik tusarniaassutigineqarlutik nassiunneqartariaqartut.
Ataatsimiititalialli oqaatigissavaa piffissami annikippallaami tusarniaaneq iluarsiivigineqakannersimasoq, Inuussutissarsiornermummi Pisortaqarfik tamatuma malitsigisaanik piffissaliussamik qaangiinissamik akuersisimammat, kissaatigineqarneratullu annertussusilimmik Pisortaqarfik tusarniaanermut atatillugu oqaloqatigiinnissanut aggersaasarsimammat.
Taamaakkaluartoq ataatsimiititaliaq pissutissaqarluni Naalakkersuisunut inassuteqarniarpoq tusarniaanerni Inatsisartut piffissaliussassatut inassutigisaasa eqqortinneqarnissaat qulakkeerniarlugu Naalakkersuisut pisariaqarneratut iliuuseqassasut.
Takornariaqarnermut Ataatsimiititaliap maluginiarpaa inatsisissatut siunnersuummut nalinginnaasumik nassuiaatini nassuiaatigineqanngitsoq oqartussaasut, kattuffiit suliffeqarfiillu sorliit inatsisissamik piareersaasiornermik suliaqarnerup ilaatut tusarniaavigineqarsimanersut. Paasissutissat amigaatigisani Takornariaqarnermut Ataatsimiititaliap Inuussutissarsiornermut Naalakkersuisumit piniarsimavai.
Tassunga attuumassuteqartumik Takornariaqarnermut Ataatsimiititaliap Inuussutissarsiornermut Naalakkersuisoq qinnuigaa UNNUISA’p taarsigassarsinikkut aningaasalersornissaata annertussusia piumasaqaatit qanoq ittut atorlugit aalajangersarneqalersaarnera erseqqinnerusumik nassuiaatigeqqullugu.
Ataatsimiititaliap apeqquteqaataa, Naalakkersuisullu akissutaa, isumaliutissiissummut matumunnga ilanngullugit tunniunneqarput.
Takornariaqarnermut Ataatsimiititaliap inassuteqaatai:
Takornariaqarnermut Ataatsimiititaliaq isumaqatigiittoq inatsisissatut siunnersuummut ima oqaaseqarniarpoq:
Ataatsimiititaliap iluarisimaarlugu maluginiarpaa takornariaqarnikkut iliuuserineqartut malunnaateqarnerulersinnissaat Naalakkersuisut suli kissaatigigaat. Inatsisissatut siunnersuut manna taamatut anguniagaqarnerup ilaatut isigisariaqarpoq.
Inatsisissatut siunnersuut Aningaasaateqarfik Unnuisa’mut TAT’millu (Takornariaqarnermi Aallarnisaasunut Tapersiisarneq) aaqqissuussinermut attuumassuteqartunik allannguutissanik arlalinnik imaqarpoq.
Aningaasaateqarfik Unnuisa’mut tunngatillugu unnuisarfioreersut iluarsaanneqarnissaannut aningaasaliissuteqarnissamut periarfissiisoqarpoq. Tamatuma peqatigisaanik aningaasaateqarfiup anguniagai ilassuserneqarput, aningaasaateqarfik suleqataanerulersinniarneqarluni, taamaalillunilu aningaasaateqarfik suliniarnermini iliuuseqarfiusinnaasunik ujartuinerusunngortinniarneqarluni.
Ataatsimiititaliap iluarisimaarlugu maluginiarpaa iliuuseriniakkat marluk tamarmik aningaasaliisut nalunaarusiaanni, Inatsisartut 1999-imi aningaasaliissuteqarfigisaanni, inassutigineqartunut naapertuuttuusut.
Taamatullu aamma inatsisissatut siunnersuutip kingunerisussaavaa aningaasalersuinikkut tapersiissutinik agguaassisarnermut tunngavissaatinneqartut sakkortusineqarnerat. Ingerlatat, - allatut iliorluni tamakkiisumik aningaasalersorneqarsinnaanngikkaluarunilluunniit - siunissaq ungasissoq eqqarsaatigalugu akilersinnaasutut naliliivigineqartut kisimik tapersiivigineqarsinnaassapput.
Iliuuseriniakkamut tassunga Takornariaqarnermut Ataatsimiititaliap apeqqutigisaanut Inuussutissarsiornermut Naalakkersuisup akissutaa ataatsimiititaliap innersuussutigissavaa, tassuuna ilaatigut takuneqarsinnaammat ukiunik pingasunik piffissaliineq nalinginnaasutigut atorneqartussanngortinneqassasoq.
Taamatut sukaallatsitsisoqarnissaa Takornariaqarnermut Ataatsimiititaliap ilalerpaa, ataatsimiititaliarmi isumaqarmat takornariaqarnermik inuussutissarsiummut aningaasat tapersiissutigineqartussatut atugassat sapinngisamik tamakkiisumik atorniarneqartariaqartut, taamaaliornikkut takornariaqarnermut inuussutissarsiummut ataavartumik iluaqutaasinnaanngortinneqassammata, taamaalillunilu aamma inuiaqatigiit aningaasaqarniarnerannut iluaqutaassallutik.
TAT’imik aaqqissuussiniarneq eqqarsaatigalugu inatsisissatut siunnersuutip kingunerissavaa tapersiinerup taarsigassarsiatut ilusilerlugu tunniunneqarsinnaajunnaarnissaa. Taamatut allanngortitsinissaq Takornariaqarnermut Ataatsimiititaliap isumaqatigiittup isumaqatigaa, taamaaliornermi allaffissornikkut sipaagaqarnermik kinguneqartussaammat, ilaatigullu, aningaasalersuivittut qangaaniilli ingerlatsivinnut, pisortat unammillertutut ingerlatsinerat unitsinneqassammat.
Takornariaqarnermut Ataatsimiititaliaq isumaqarpoq inatsisissatut siunnersuut Unnuisa’mut aamma TAT’imik aaqqissuussamut patajaallisaataasussamik kinguneqassasoq.
Taamaammat Takornariaqarnermut Ataatsimiititaliap isumaqatigiittup Inatsisartunut inassutigaa siunnersuut akuersissutigeqqullugu, Takornariaqarnermulli Ataatsimiititaliap isumaqatigiittup Naalakkersuisunut kaammattuutigaa Naalakkersuisut allannguutissatut siunnersuummik saqqummiussissasut, tamanna naapertorlugu Aningaasaateqarfiup Unnuisap aamma TAT-imut ataatsimiititaliap suliniutaat pillugit Inatsisartunut ukiumoortumik nalunaarusiamik tunniussisarnissamut Naalakkersuisut pisussaatinneqartussanngorlugit.
Ruth Heilmann, Siumut
SiulittaasoqMalînánguaq Marcussen Mølgaard, Inuit Ataqatigiit
Per Rosing-Petersen, Siumut
Finn Karlsen, Atassut
Loritha Henriksen, Kattusseqatigiit